სამხრეთ ინდოეთის შტატ კერალაში თავსხმა წვიმისა და წყალდიდობის შედეგად სულ მცირე რვა ადამიანი გარდაიცვალა, ათეულობით ადამიანი კი დაიკარგა. ამის შესახებ ინფორმაციას The Washington Post ავრცელებს.
კატასტროფაზე რეაგირების ეროვნულმა ძალამ და ინდოეთის არმიამ ორ ყველაზე მეტად დაზარალებულ რაიონში, კოტაიამში და იდუკში, სამაშველო სამუშაოების ჩასატარებლად ორი ჯგუფი გაგზავნა.
ოფიციალური პირების თქმით, ნალექის რაოდენობა შემცირდა, თუმცა დაღუპულთა რაოდენობა შესაძლოა გაიზარდოს, რადგან სამძებრო და სამაშველო სამუშაოები ჯერ კიდევ გრძელდება.
2018 წელს კერალას კატასტროფული წყალდიდობა დაატყდა თავს, როდესაც ძლიერმა წვიმებმა 223 ადამიანი იმსხვერპლა და ასობით ათასი კი უსახლკაროდ დატოვა.