აშშ-ის ყოფილი პრეზიდენტი ბარაქ ობამა ყოფილ სახელმწიფო მდივან კოლინ პაუელს „სამაგალითო ჯარისკაცსა და პატრიოტს“ უწოდებს.

„პაუელი ათწლეულების განმავლობაში ხელს უწყობდა ამერიკული პოლიტიკის ჩამოყალიბებას. მისი ქმედებები ასახავდა იმას, რაც მას მიაჩნდა, რომ საუკეთესო იყო ამერიკისთვის და იმ ხალხისთვის, ვისაც ის ემსახურებოდა,“- აღნიშნულია ობამას განცხადებაში, რომელიც მან გარდაცვლილ ყოფილ სახელმწიფო მდივანთან დაკავშირებით გაავრცელა.

„მე და მიშელი გენერალ პაუელს ყოველთვის შევაფასებთ, როგორც მაგალითს იმისას, თუ როგორი შეიძლება და უნდა იყოს ამერიკა და ამერიკელები, თუ გვსურს დავრჩეთ დედამიწის უკანასკნელ, საუკეთესო იმედად,“ - წერს ობამა.

ცნობისათვის, 2008 წლის საპრეზიდენტო არჩევნებამდე ორი კვირით ადრე კოლინ პაუელმა მოულოდნელი განცხადება გააკეთა: მან მხარი დაუჭირა „დემოკრატიული პარტიის“ კანდიდატს ბარაკ ობამას და არა თავის ძველ მეგობარს, ჯონ მაკკეინს. „ვფიქრობ, რომ ცვლილება გვჭირდება”, - აღნიშნა მაშინ პაუელმა. იმ დროს ეს იყო გადაწყვეტილება, რასაც არც ბარაქ ობამა და არც კოლინ პაუელის თანამოაზრე, „რესპუბლიკელი“ კანდიდატი ჯონ მაკკეინი ელოდა.

შეგახსენებთ, გუშინ ცნობილი გახდა, რომ კოლინ პაუელი კორონავირუსის გართულებების შედეგად 84 წლის ასაკში გარდაიცვალა.