რუსეთის პრეზიდენტი ვლადიმერ პუტინი დაეთანხმა მთავრობის შეთავაზებას და კორონავირუსის შემთხვევების ზრდის გამო ქვეყანაში ერთკვირიანი არასამუშაო რეჟიმი გამოაცხადა.
მედიის ინფორმაციით, უქმე დღეები 30 ოქტომბერს დაიწყება და 7 ნოემბრამდე გაგრძელდება.
ამასთან, დასაქმებულები აღნიშნულ პერიოდში ხელფასს ჩვეულ რეჟიმში მიიღებენ.
ვლადიმერ პუტინის განმარტებით, ქვეყნის ცალკეულ რეგიონში უქმე დღეების დაწყებისა და დასრულების დრო, შესაძლოა, შეიცვალოს.
”ეპიდემიოლოგიური მდგომარეობა თითოეულ რეგიონში განსხვავებულია, ამის გათვალისწინებით, რეგიონების ხელმძღვანელებს ეძლევათ უფლება მიიღონ დამატებითი ზომები,“- აღნიშნა რუსეთის პრეზიდენტმა.
შეგახსენებთ, ბოლო პერიოდში რუსეთში კორონავირუსით ინფიცირებისა და გარდაცვალების შემთხვევები მნიშვნელოვნად იზრდება. ქვეყანაში დღეს ფატალური შემთხვევების მორიგი ანტირეკორდი - გარდაცვალების 1 028 შემთხვევა - დაფიქსირდა. ამასთან, ბოლო 24 საათში კორონავირუსი კიდევ 34 073 ადამიანს დაუდასტურდა.