სააკაშვილს საზღვარი უკანონოდ აქვს გადმოკვეთილი არაჟანთან ერთად, შესაბამისად, მას ახალი მუხლის შეფარდება ეკუთვნის - ეს გააკეთა დღეს პროკურატურამ,- ამის შესახებ „ქართული ოცნების“ თავმჯდომარემ ირაკლი კობახიძემ ჟურნალისტებს განუცხადა, რითაც საქართველოში მიხეილ სააკაშვილის შემოსვლასთან დაკავშირებით პროკურატურის მიერ დღეს გაკეთებულ განცხადებას გამოეხმაურა.

გარდა ამისა, კითხვაზე იმის შესახებ, რომ თუ მმართველი გუნდის შეფასებით, სააკაშვილი პოლიტიკური ავანტიურისტია, რატომაა საჭირო მისი ჰოსპიტალიზაციისთვის ექიმთა ჯგუფის მობილიზება, კობახიძე ამბობს, რომ „საქართველოში ადამიანის უფლებები 2012 წლიდან დაცულია, სააკაშვილიც ერთ-ერთი ადამიანია და მისი ადამიანის უფლებაც დაცულია“.

„შეიძლება ევროპაში არიან ლობისტები, რომლებსაც ეჭვი ეპარებათ, გადმოკვეთა თუ არა საზღვარი უკანონოდ მიხეილ სააკაშვილმა, მაგრამ სააკაშვილს უკანონოდ აქვს გადმოკვეთილი საზღვარი არაჟანთან ერთად, შესაბამისად, მას ახალი მუხლის შეფარდება ეკუთვნის, ეს გააკეთა დღეს პროკურატურამ“,- განაცხადა ირაკლი კობახიძემ.