ნატოს წევრი ქვეყნების თავდაცვის მინისტრების შეხვედრაზე, ბრიუსელში, ალიანსის თავდაცვის გლობალური გეგმა დაამტკიცეს, რაც მასში შემავალი სახელმწიფოების მილიარდი მცხოვრების ნებისმიერი საფრთხისგან დაცვას ითვალისწინებს.
ამის შესახებ ნატოს გენერალურმა მდივანმა იენს სტოლტენბერგმა მინისტრთა სხდომის პირველი დღის შემდეგ, პრესკონფერენციაზე განაცხადა.
„მინისტრებმა დღეს დაამტკიცეს ყოვლისმომცველი გეგმა ჩვენი ალიანსის დაცვის შესახებ, კონფლიქტებისა და კრიზისების შემთხვევაში, რომელიც საშუალებას მოგვცემს, ვიყოთ დარწმუნებულები იმაში, რომ ჩვენი ძალები გააგრძელებენ ყოფნას საჭირო ადგილას და საჭირო დროს, რათა დაიცვან ერთი მილიარდი ადამიანი ნებისმიერი საფრთხისგან“, - განაცხადა სტოლტენბერგმა.
მისი თქმით, ნატოს თავდაცვის მინისტრებმა ასევე დაამტკიცეს ალიანსის წევრი სახელმწიფოების აუცილებელი ამოცანები ახალი შეიარაღებისა და ტექნიკის შესაძენად.