რუსეთში, გასული დღე-ღამის განმავლობაში, კორონავირუსით დაინფიცირების 37 141 შემთხვევა გამოვლინდა, რაც რეკორდულად მაღალი დღიური მაჩვენებელია ქვეყნისთვის პანდემიის დაწყების დროიდან.

ამასთან, რუსეთში, ბოლო 24 საათში, ვირუსს კიდევ 1 064 ადამიანი ემსხვერპლა, რაც ასევე ყველაზე მაღალი დღიური მაჩვენებელია ქვეყნისთვის.

რუსეთში ჯამში, ინფიცირების 8 168 305 შემთხვევაა დადასტურებული, აქედან ვირუსს 228 453 ადამიანი ემსხვერპლა, გამოჯანმრთელდა 7 117 060 პაციენტი.

შეგახსენებთ, გაუარესებული ეპიდვითარების ფონზე რუსეთში ერთკვირიანი არასამუშაო რეჟიმი გამოცხადდა, რომელიც 30 ოქტომბერს დაიწყება და 7 ნოემბრამდე გაგრძელდება. ამასთან, ქვეყნის დედაქალაქში, მოსკოვში 28 ოქტომბრიდან 7 ნოემბრამდე ნაწილობრივი „ლოქდაუნი“ წესდება.