ჩინეთის ხელისუფლებამ ქვეყნის სხვადასხვა ნაწილში კორონავირუსით ინფიცირების შემთხვევების გამოვლენის გამო მკაცრი შეზღუდვების დაწესების გადაწყვეტილება მიიღო.
მედიის ინფორმაციით, პეკინის ერთ-ერთ რაიონში იმ ტერიტორიებზე მცხოვრებ ადამიანებს, სადაც დაინფიცირების მაღალი რისკი არსებობს, სახლებიდან გასვლა აუკრძალეს, დაიხურა სკოლები და ბიზნეს ობიექტებს მუშაობის შეჩერება დაევალათ.
პეკინში, რომელმაც პირობა დადო, რომ 2022 წლის ზამთრის ოლიმპიური თამაშების წინ განსაკუთრებულ სიფრთხილეს გამოიჩენს ეპიდსიტუაციის მიმართ, მიმდინარე კვირაში, კორონავირუსით ინფიცირების 6 შემთხვევა გამოვლინდა.
ჰებეის პროვინციაში მიმდინარე კვირაში უსიმპტომო დაინფიცირების ოთხი დადასტურებული შემთხვევა გამოვლინდა. შემთხვევები დაფიქსირდა განსუს პროვინციაშიც. პროვინციის ათამდე ქალაქში ხელისუფლებამ საქალაქთაშორისო ავტობუსების მოძრაობა აკრძალა. შეიზღუდა მატარებლების მოძრაობაც. ცინხაის პროვინციაში აეროპორტმა, რომელიც სატრანზიტო რეისებს ემსახურება, მუშაობა შეაჩერა.
ყველა ტურისტული ადგილი დაიხურა ნინსიას, განსუსა და ცინხაის პროვინციებში.
ჩინეთში მსოფლიოს სხვა ქვეყნებთან შედარებით კორონავირუსის მცირე შემთხვევები ფიქსირდება, თუმცა ქვეყნის ხელისუფლება ხელმძღვანელობს გაიდლაინით, რომელიც კორონავირუსის მიმართ „ნულოვან ტოლერანტობას“ ითვალისწინებს.