ადვოკატი - იუსტიციის სამინისტროს გენერალური ინსპექციიდან შემატყობინეს, რომ დაწყებულია წარმოება გუშინდელ ინციდენტთან დაკავშირებით და ამ თემაზე სურთ მიხეილ სააკაშვილთან გასაუბრება

გუშინ სასჯელაღსრულების დაწესებულებამ გაავრცელა განცხადება, რომლის შინაარსი უბრალოდ სასაცილო იყო, ეს იყო რეალურად ბოდიში ივანიშვილისთვის, რომ მიხეილ სააკაშვილმა მოახერხა საზოგადოებასთან კომუნიკაციის დამყარება, - ამის შესახებ ყოფილი პრეზიდენტის, მიხეილ სააკაშვილის ადვოკატმა, დიმიტრი საძაგლიშვილმა რუსთავის ციხესთან, ჟურნალისტებს განუცხადა.

როგორც დიმიტრი საძაგლიშვილმა განმარტა, აღნიშნულ საკითხთან დაკავშირებით, დაიწყო საქმის წარმოება და იუსტიციის სამინისტროს გენერალურ ინსპექციას ყოფილ პრეზიდენტთან გასაუბრება სურს.

ადვოკატის შეფასებით, „ქართული ოცნების“ ლიდერები არაადეკვატურ განცხადებებს აკეთებენ და მისივე თქმით, რთულია პროგნოზის გაკეთება, ამ საკითხზე რა გადაწყვეტილება იქნება მიღებული.

„აუცილებლად მინდა ხაზი გავუსვა, გუშინ სასჯელაღსრულების დაწესებულებამ გაავრცელა განცხადება, რომლის შინაარსი უბრალოდ იყო სასაცილო. ეს იყო რეალურად ბოდიში ივანიშვილისთვის, რომ მიხეილ სააკაშვილმა მოახერხა საზოგადოებასთან კომუნიკაციის დამყარება. ამ განცხადებიდან ირკვევა, რომ ისინი დარღვევად მიიჩნევენ სასჯელაღსრულების დაწესებულებაში ხმაურის შექმნას, კერძოდ, როგორც ჩანს, მიხეილ სააკაშვილმა საკუთარ მომხრეებს და მხარდამჭერებს რომ გამოსძახა „მიყვარხართ,“ „თქვენთან ერთად ვარ“ და „მაგრები ხართ,“ ეს ყოფილა მათი შეფასებით შინაგანაწესის დარღვევა. დღეს მე დამიკავშირდნენ იუსტიციის სამინისტროს გენერალური ინსპექციიდან და შემატყობინეს, რომ დაწყებულია წარმოება გუშინდელ ინციდენტთან დაკავშირებით და ამ თემაზე სურთ მიხეილ სააკაშვილთან გასაუბრება. წარმოდგენა არ მაქვს რა შეიძლება იყოს ამ წარმოების შედეგი, რადგან ყოველგვარ საღ აზრს არის მოკლებული განცხადების გაკეთება, რა შეიძლება გააკეთოს ხელისუფლებამ, მით უმეტეს იმის ფონზე, როდესაც ჩვენ ვისმენთ სრულიად არაადეკვატურ განცხადებებს პრემიერ-მინისტრისგან, პარტიის თავმჯდომარისგან და ა.შ. ყველა მაღალი თანამდებობის პირი აკეთებს არაადეკვატურ განცხადებებს მიხეილ სააკაშვილთან დაკავშირებით. ისინი აშკარად არიან შეშინებული და შესაბამისად, მათი გადაწყვეტილებების პროგნოზირება არ მიმაჩნია, რომ სწორია“, - განაცხადა დიმიტრი საძაგლიშვილმა.

მისი თქმით, ჰოსპიტალიზაციის აუცილებლობის შემთხვევაში, მიხეილ სააკაშვილის გადაყვანა გლდანის მე-18 დაწესებულებაში არ მოხდება.

„რეალურად, ჰოსპიტალიზებასთან დაკავშირებით გვინდა ხაზი გავუსვათ გარემოებას, რომ არავინ ითხოვს რაღაც პრივილეგიას. მიღებული პრაქტიკა და სტანდარტი არის ის, რომ რუსთავის სასჯელაღსრულების დაწესებულებას ხელშეკრულება აქვს გაფორმებული კერძო კლინიკასთან და იქ ხდება ყოველთვის პატიმრის ჰოსპიტალიზება. ჩვენ შემთხვევაში, ჯერ მოვისმინეთ იუსტიციის მინისტრის განცხადება, რომ ისინი შეასრულებენ სამედიცინო კონსილიუმის რეკომენდაციებს სრულად. ამის შემდეგ ითქვა, რომ ჰოსპიტალის შემთხვევაშიც ჯერ შერჩევა მოხდება ექიმების მიერ გაცემული რეკომენდაციის შედეგად, მაგრამ ამ ყველაფრის მიუხედავად, მეორე დღეს უკვე მოვისმინეთ იუსტიციის მინისტრის განცხადება, რომ ჰოსპიტალიზება მოხდება მხოლოდ მე-18 დაწესებულებაში, გლდანის ციხის ტერიტორიაზე. ეს განცხადება გააკეთა ასევე პრემიერ-მინისტრმა, რომელსაც არანაირი ლეგიტიმური შეხება არ უნდა ჰქონდეს მსჯავრდებულის ჰოსპიტალიზების პროცესთან. ჩვენთვის ბუნებრივია მიუღებელია გლდანის ციხეში მიხეილ სააკაშვილის გადაყვანა, რადგან ეს ადამიანი არის, რომელმაც დაამარცხა კრიმინალი და ხელისუფლება აპირებს, რომ მის მიერ ორგანიზებულ და წაქეზებულ კრიმინალებთან მოათავსოს გლდანის დაწესებულებაში. მიხეილ სააკაშვილის ჰოსპიტალიზება მე-18 დაწესებულებაში ფიზიკურად არ გამოვა და ერთადერთი, რაც შეიძლება ვთქვათ, არის ის, რომ მის ჯანმრთელობაზე სრულად ეკისრება პასუხისმგებლობა საქართველოს ხელისუფლებას“, - აღნიშნა საძაგლიშვილმა.

რაც შეეხება ტელეკომპანია „იმედის“ მიერ 21 ოქტომბერს გავრცელებულ ვიდეოს, რომელიც „იმედის“ მტკიცებით, ტრაილერშია გადაღებული, როცა სააკაშვილი უკრაინიდან თბილისში მოდიოდა, დიმიტრი საძაგლიშვილმა აღნიშნა, რომ ტელეკომპანიის მხრიდან ადგილი აქვს დანაშაულს.

„კადრებთან დაკავშირებით გეტყვით იმას, რაც ყველაზე მნიშვნელოვანია. საქმის მასალების მიხედვით, მიხეილ სააკაშვილის დაკავებისას ამოღებულ იქნა ტელეფონი და ეს ტელეფონი დაიმტვრა, რომელიც გადაგზავნილია ექსპერტიზაზე. ამის მიუხედავად, ტელეკომპანია „იმედის“ ჟურნალისტმა, რაც წარადგინა, მისი ტელეფონით არის ეს ვიდეო მასალა და მიხეილ სააკაშვილის მიერაა გადაღებული, რაც უთითებს ერთადერთ რამეზე, თუ ასეა ნამდვილად, ეს არის უბრალოდ დანაშაული. დალუქული ტელეფონიდან, როგორ აღმოჩნდა ვიდეო მასალა ტელეკომპანია „იმედში“, ბუნებრივია, არ არსებობს ამის ლეგიტიმური გზა და ცალსახად, შეიძლება ერთადერთი შეფასება გავაკეთოთ, - ეს არის დანაშაული“, - განაცხადა ადვოკატმა.

ალექსეი გარანი - კიევსა და მოსკოვს შორის მინსკი 2-ის მსგავსი არანაირი შეთანხმება არ გაფორმდება, რადგან, რაც რუსეთმა  უკრაინაში 24 თებერვლის შემდეგ ჩაიდინა, ეს წარმოუდგენელია
ზაზა ფირალიშვილი - ენტონი ბლინკენის წერილი საქართველოს საგარეო საქმეთა მინისტრისადმი აშკარა ნიშანია იმისა, რომ ჩვენი ხელისუფლების ქცევა ევროატლანტიკურ სივრცეში სერიოზულ ეჭვებს იწვევს
ქართული პრესის მიმოხილვა 23.05.2022
ჰუბერტ ქნირში - გზა ევროკავშირში გაწევრიანებისკენ ჯერ კიდევ გრძელია - ის, რაც რამდენიმე კვირაში ევროპის საბჭომ შეიძლება გადაწყვიტოს, არის გზის დასაწყისი, არის გადაწყვეტილება, რომ ჩვენ ერთად გვინდა ამ გზის გავლა
„ლისი ინტელიგენციის“ განვითარებისთვის დახარჯული ჯამური ინვესტიცია 1 500 000 ლარს უტოლდება
Fitch Ratings-მა ბაზისბანკს საკრედიტო რეიტინგი „B+“ დაუდასტურა
4-5 ივნისს თბილისის საკონცერტო დარბაზში „ერისიონი“ ახალი პროგრამით წარდგება
IF Design-ის 2022 წლის ღონისძიებაზე ჰიუნდაიმ 9 ჯილდო მოიპოვა
რომელ Galaxy A სმარტფონს ირჩევ შენ?
ვებსტერის უნივერსიტეტსა და თიბისის შორის მემორანდუმი გაფორმდა
ლიბერთი ბანკი - დიდი პასუხისმგებლობა და პატივია უნიკალური ინფრასტრუქტურით მოვემსახუროთ სოციალური გასაცემლების მიმღებ პირებს