მთელი მსოფლიო უნდა აიცრას იმისთვის, რომ კორონავირუსის ახალი ვარიანტების წარმოშობა შეწყდეს, - ამის შესახებ ჯანდაცვის მსოფლიო ორგანიზაციის პრესსპიკერმა მარგარეტ ჰარისმა განაცხადა.

“ჩვენ ძალიან ცუდ მდგომარეობაში ვართ მსოფლიოს უმეტეს ნაწილში, გველოდება უფრო მეტი ვარიანტის განვითარება, მეტი გავრცელება,“- აღნიშნა ჯანმო-ს წარმომადგენელმა.

მისივე თქმით, ვაქცინაციის დროს პრიორიტეტი უნდა მიენიჭოს ჯანდაცვის მუშაკებს და ასევე დაინფიცირების მაღალი რისკის ქვეშ მყოფ სხვა პირებს. ამასთან, მისი განმარტებით პანდემიის დამარცხება მხოლოდ ვაქცინაციაზე არაა დამოკიდებული.

„პანდემიისგან თავს მხოლოდ ვაქცინაციით ვერ დავიხსნით, სხვა ზომებიც უნდა მივიღოთ. სერიოზულად უნდა მოვეკიდოთ ხალხმრავლობას და ასევე უნდა ვიზრუნოთ პირბადეების ტარებაზე, განსაკუთრებით დახურულ სივრცეებში ყოფნისას,“- აღნიშნა მარგარეტ ჰარისმა.