სუდანში, მომიტინგეებსა და სამხედრო ძალებს შორის შეტაკებების შედეგად 12 ადამიანი დაშავდა
სუდანის დედაქალაქ ხარტუმში მომიტინგეებსა და სამხედრო ძალებს შორის შეტაკებების შედეგად 12 ადამიანი დაშავდა.საპროტესტო გამოსვლები ქვეყანაში სამხედრო გადატრიალებასა და პრემიერ-მინისტრისა და მთავრობის სხვა წევრების დაკავებას მოჰყვა.
სუდანის სუვერენული საბჭოს ხელმძღვანელმა, გენერალმა აბდელ ფატაჰ აბდელრაჰმან ბურჰანმა საბჭო და მინისტრთა კაბინეტი დაითხოვა და ქვეყანაში საგანგებო მდგომარეობა გამოაცხადა.
მისი თქმით, დროებითი მთავრობის წარდგენა ნოემბრის ბოლომდე მოხდება, საპარლამენტო არჩევნები კი ქვეყანაში 2023 წლის ივლისში ჩატარდება.
ევროკავშირის უმაღლესმა წარმომადგენელმა საგარეო საკითხებში ჟოზეფ ბორელმა განაცხადა, რომ სუდანში განვითარებულ მოვლენებს „დიდი შეშფოთებით ადევნებს თვალს“.
„ევროკავშირი მოუწოდებს ყველა დაინტერესებულ მხარეს და რეგიონალურ პარტნიორს, გარდამავალი პროცესი ჩვეულ რეჟიმს დაუბრუნონ“, - ნათქვამია ჟოზეფ ბორელის განცხადებაში.
ამასთან, გაერომ სუდანის უსაფრთხოების ძალებს დაკავებულების დაუყოვნებლივ გათავისუფლებისკენ მოუწოდა.
