საელჩოების მიერ დღეს გაკეთებული ახალი განცხადები ჩვენი ქვეყნისა და ერის მიმართ ცილისწამებისგან უკან დახევა იყო. მჯერა, რომ ეს ელჩები მეტ სიფრთხილეს გამოიჩენენ თურქეთის სუვერენულ უფლებებთან დაკავშირებით განცხადებების გაკეთებისას, - ამის შესახებ თურქეთის პრეზიდენტმა რეჯეფ თაიფ ერდოღანმა მინისტრთა კაბინეტთან შეხვედრის შემდეგ განაცხადა.

მისივე თქმით, თურქეთის მიზანი კრიზისის შექმნა არ არის.

"ჩვენი მიზანი არასდროს ყოფილა კრიზისების შექმნა, ჩვენი მიზანია ჩვენი ქვეყნის უფლებების, კანონების, პატივისა და სუვერენიტეტის დაცვა", - აღნიშნა ერდოღანმა.

თურქეთის პრეზიდენტმა ეს განცხადება მას შემდეგ გააკეთა, რაც იმ საელჩოებმა, რომელთა ელჩების პერსონა ნონ-გრატად გამოცხადებასაც გეგმავდა, გაავრცელეს განცხადებები, სადაც აღნიშნულია, რომ ისინი იცავენ დიპლომატიური ურთიერთობების შესახებ ვენის კონვენციის 41-ე მუხლს, რომელიც დიპლომატებს მიმღები სახელმწიფოს კანონებისა და რეგულაციების დაცვას, ასევე ამ სახელმწიფოს შიდა საქმეებში ჩაურევლობას ავალდებულებს.

შეგახსენებთ, 23 ოქტომბერს თურქეთის პრეზიდენტმა განაცხადა, რომ ქვეყნის საგარეო საქმეთა სამინისტროს 10 ქვეყნის ელჩების პერსონა ნონ გრატად გამოცხადება დაავალა, რომლებმაც თურქეთის ხელისუფლებას დაპატიმრებული თურქი ბიზნესმენის, ოსმან კავალას დაუყოვნებლივ გათავისუფლებისკენ მოუწოდეს.