ეგვიპტის პრეზიდენტმა, აბდელ ფათაჰ ალ-სისიმ ქვეყანაში წლების წინ დაწესებული საგანგებო მდგომარეობის დასრულების გადაწყვეტილება მიიღო, - Reuters-ის ინფორმაციით, ამის შესახებ აბდელ ფათაჰ ალ-სისიმ სოციალურ ქსელ „ფეისბუქში“ დაწერა.
„ეგვიპტე უსაფრთხოებისა და სტაბილურობის ოაზისი გახდა რეგიონში. ამიტომ პირველად წლების განმავლობაში მე გადავწყვიტე, გავაუქმო საგანგებო მდგომარეობის გახანგრძლივება ქვეყნის მთელს ტერიტორიაზე“, – აცხადებს ეგვიპტის პრეზიდენტი.
ეგვიპტეში საგანგებო მდგომარეობა 2017 წლის აპრილიდან მოქმედებდა, მას შემდეგ, რაც ეკლესიებში აფეთქებები და თავდასხმები განხორციელდა, რასაც 100-ზე მეტი ადამიანის სიცოცხლე ემსხვერპლა და ყოველ 3 თვეში ხანგრძლივდებოდა.
საგანგებო მდგომარეობა ხელისუფლებას ორდერის გარეშე დაკავების, ეჭვმიტანილების წინააღმდეგ სისხლის სამართლებრივი დევნის სწრაფად განხორციელებისა და სპეციალური სასამართლოების შექმნის უფლებამოსილებას ანიჭებდა.