კორონავირუსით დაინფიცირების შემთხვევებისა და ჰოსპიტალიზაციის მაჩვენებლის ზრდის ფონზე, ბელგიაში გარკვეული შეზღუდვები კვლავ ამოქმედდება.
მედიის ინფორმაციით, 29 ოქტომბრიდან საზოგადოებრივი თავშეყრის ადგილებში პირბადის ტარება სავალდებულო გახდება, პირბადეები უნდა ატარონ ასევე კაფეების, რესტორნებისა და ფიტნეს დარბაზების თანამშრომლებმა. ამასთან, საზოგადოებრივ ადგილებში შესასვლელად აუცილებელი იქნება კოვიდპასპორტის წარდგენა.
„ჩვენი დაცვის კედლები უნდა ავწიოთ“, - განაცხადა ბელგიის პრემიერ-მინისტრმა, ალექსანდერ დე კრომ.
ბელგიაში, ინფიცირების დღიური მაჩვენებელი ბოლო კვირის განმავლობაში 75%-ით გაიზარდა და 5 299 შემთხვევას მიაღწია. ამასთან, 69%-ით გაიზარდა ჰოსპიტალიზებული პაციენტების რაოდენობა.