ესტონეთის თავდაცვის მინისტრი ნატო-საქართველოს წვრთნებისა და შეფასების ერთობლივ ცენტრში იმყოფებოდა. აღნიშნულ ინფორმაციას საქართველოს თავდაცვის სამინისტრო ავრცელებს.
უწყების ცნობით, საქართველოში ოფიციალური ვიზიტით მყოფი ესტონეთის თავდაცვის მინისტრი, კალე ლაანეტი, კრწანისში, ნატო-საქართველოს წვრთნებისა და შეფასების ერთობლივ ცენტრს (JTEC) ესტუმრა.
ესტონეთის თავდაცვის მინისტრს მასპინძლობა საქართველოს თავდაცვის ძალების მეთაურის მოადგილემ, გენერალ-მაიორმა, ზაზა ჩხაიძემ და ცენტრის მეთაურმა, ვიცე-პოლკოვნიკმა, დავით გაგუამ გაუწიეს. ვიცე-პოლკოვნიკმა, დავით გაგუამ სტუმრებს ცენტრის ისტორიის, საქმიანობის, მიზნებისა და ამოცანების შესახებ საინფორმაციო ბრიფინგი ჩაუტარა და სამომავლო გეგმებთან დაკავშირებით დეტალური ინფორმაცია მიაწოდა. ესტონეთის თავდაცვის მინისტრმა სიმულაციური ცენტრიც დაათვალიერა და სამხედრო აღჭურვილობის შესაძლებლობებს გაეცნო.
ცნობისთვის, ესტონეთის თავდაცვის მინისტრი კალე ლაანეტი საქართველოში ორდღიანი ოფიციალური ვიზიტით იმყოფება. მან უკვე გამართა შეხვედრები თავდაცვის სამინისტროსა და ეროვნულ გვარდიაში. ვიზიტის ფარგლებში ესტონეთის დელეგაცია კიბერუსაფრთხოების ბიუროსაც ესტუმრება.