უკრაინელი ჟურნალისტი, დიმიტრი გორდონი აცხადებს, რომ საქართველოში არ შეუშვეს. „ახლახან გამომიცხადეს ოფიციალურად, რომ საქართველოში არ მიშვებენ. მიზეზები არ დასახელებულა. ამას ცალსახად ვუკავშირებ იმას, რომ წინა დღეს უკრაინის საგარეო საქმეთა სამინისტრომ მიმართა საქართველოს საგარეო საქმეთა სამინისტროს თხოვნით, ორგანიზება გაეწიათ მიხეილ სააკაშვილთან რუსთავის ციხეში ჩემი ვიზიტისთვის. ყველაფერი, რაც მოხდა, არის საერთაშორისო სკანდალი და სირცხვილი საქართველოს ხელისუფლებისთვის,“- წერს გორდონი „ტელეგრამში“.

ამასთან, ცოტა ხნის წინ უკრაინის ომბუდსმენმა ლუდმილა დენისოვამ განაცხადა, რომ ის საქართველოში შემოსვლისას საზღვარზე 40 წუთის განმავლობაში დააყოვნეს და მხოლოდ მისი მხრიდან განხორციელებული გარკვეული ზარებისა და მუქარის შემდეგ შემოუშვეს საქართველოში. მანამდე, მიხეილ სააკაშვილის უკრაინელმა ადვოკატმა ევგენი გრუშოვეცმა გაავრცელა ინფორმაცია, რომ საქართველოში შესვლაზე ყველანაირი ახსნა-განმარტების გარეშე უარი უთხრეს და უკრაინაში გააბრუნეს. იგივეს აცხადებს უკრაინაში მიხეილ სააკაშვილის ოფისის ხელმძღვანელი მარია ბარაბაში.