პორტუგალიის პარლამენტმა ქვეყნის პრემიერ-მინისტრის, ანტონიო კოსტას მიერ შეთავაზებულ 2022 წლის სახელმწიფო ბიუჯეტის პროექტს მხარი არ დაუჭირა.

ბიუჯეტის წინააღმდეგ ხმა 117-მა დეპუტატმა მისცა, 108-მა კანონმდებელმა მის მიღებას დაუჭირა მხარი, 5-მა კი - თავი შეიკავა.

პორტუგალიის კონსერვატიულმა პრეზიდენტმა მარსელო რებელო დე სუზამ კენჭისყრის გამართვამდე პარლამენტი გააფრთხილა, რომ ბიუჯეტის პროექტის ჩაგდების შემთხვევაში ის საკუთარ უფლებამოსილებას გამოიყენებს, პარლამენტს დაითხოვს და ვადამდელ საპარლამენტო არჩევნებს დანიშნავს.

„ჩემი პოზიცია ძალიან მარტივია, ან იქნება ბიუჯეტი, ან იქნება დაშლა“, - განაცხადა პრეზიდენტმა.

მედიის ინფორმაციით, ეს არის პირველი შემთხვევა 1974 წლიდან, როდესაც პორტუგალიაში ბიუჯეტი არ დაამტკიცეს.