სომხეთთან ურთიერთობის ნორმალიზების საკითხზე გადაწყვეტილებას თურქეთი აზერბაიჯანთან ერთად მიიღებს. ამის შესახებ თურქულ „სი-ენ-ენთან“ ინტერვიუში თურქეთის საგარეო საქმეთა მინისტრმა მევლუთ ჩავუშოღლუმ განაცხადა.

„ეს საკითხი აზერბაიჯანის საგარეო საქმეთა მინისტრთან ჯეიჰუნ ბაირამოვთან ერთად განვიხილეთ პრეზიდენტ რეჯეფ თაიფ ერდოღანის ვიზიტის დროს ფიზულიში“, - აღნიშნა ჩავუშოღლუმ და დასძინა, რომ ამავდროულად, სომხეთიდანაც წამოვიდა დადებითი სიგნალები, რომლებზეც ანკარა ასევე დადებითად უპასუხებს.

„ხოლო, როგორ ნაბიჯებს გადავდგამთ აზერბაიჯანთან ერთად, ამასაც განვიხილავთ. აზერბაიჯანმა სომხეთს შესთავაზა სამშვიდობო შეთანხმების ხელმოწერა, მაგრამ სომხეთში ამაზე რაიმე სახის დადებითი ძვრა არ მომხდარა“, - აღნიშნა მინისტრმა.

მისივე თქმით, ყველა გადაწყვეტილება სომხეთის შესახებ, მხოლოდ ბაქოსთან თანამშრომლობით იქნება მიღებული.