სომხეთსა და აზერბაიჯანს შორის სახელმწიფო საზღვრის დადგენის საკითხი არ შეიძლება გადაწყდეს რუსეთის მონაწილეობის გარეშე, - სომხური მედიის ინფორმაციით, ამის შესახებ ქვეყნის პრეზიდენტმა არმენ სარქისიანმა განაცხადა.

მისი თქმით, გასული წლის მთიანი ყარაბაღის ომის დასრულების პირველივე დღიდან ორ ქვეყანას შორის წარმოიშვა პრობლემები საზღვრის დადგენასთან დაკავშირებით, თუ სად გადის ის ზუსტად. სარქისიანის განცხადებით, აზერბაიჯანული მხარე ამ მხრივ ვირტუალურ რუკებს იყენებს, პრეზიდენტი კი მიიჩნევს, რომ ფაქტობრივი საზღვარი ყოფილი საბჭოთა კავშირის რუკებით უნდა განისაზღვროს.

„სხვა შემთხვევაში მხარეები, პირველ რიგში, აზერბაიჯანული მხარე, „გუგლის“ რუკებს გამოიყენებს,“- აღნიშნა სომხეთის პრეზიდენტმა და დასძინა, რომ ამ შემთხვევაში კომპიუტერული პროგრამირების მცოდნე ნებისმიერ ადამიანს შეუძლია საზღვრის ნებისმიერ ადგილზე „დახაზვა“.