მამუკა მდინარაძე - „ნაცმოძრაობის“ ტელევიზიების ჟურნალისტები ცდილობენ ჩვენი წარმომადგენლების ბულინგს და ეკითხებიან მათ, რატომ აქვთ სიები

არჩევნები მშვიდად მიმდინარეობს, რაიმე არსებითი დარღვევების გარეშე, ოღონდ ვხედავთ სერიოზულ პროვოკაციებს და ძირითადად ეს პროვოკაციები, ჩვენი წარმომადგენლების ბულინგი, მიმდინარეობს „ნაცმოძრაობის“ ტელევიზიების ჟურნალისტების მხრიდან,- ამის შესახებ „ქართული ოცნების“ აღმასრულებელმა მდივანმა მამუკა მდინარაძემ პარტიის ოფისში გამართულ ბრიფინგზე განაცხადა.

მდინარაძის განმარტებით, კანონის შესაბამისად, ნებისმიერი პარტიის წარმომადგენელს, თუ ის იცავს 100-მეტრიან დისტანციას, აქვს უფლება ჰქონდეს სიები, მოახდინოს ამომრჩევლის მობილიზება და აწარმოოს სააგიტაციო მუშაობა.

„მე მინდა საზოგადოებას მივაწოდო ინფორმაცია იმის შესახებ, რომ არჩევნები ძირითადად მიმდინარეობს ძალიან მშვიდად. სიტყვა „ძირითადად“ იმიტომ გამოვიყენე, რომ იქ, სადაც ხელოვნურად შექმნილი პროვოკაციული ფონი არ არის, ყველგან მშვიდად მიმდინარეობს არჩევნები, რაიმე არსებითი დარღვევების გარეშე, ოღონდ ვხედავთ სერიოზულ პროვოკაციებს და რა სამწუხაროც არ უნდა იყოს, ძირითადად ეს პროვოკაციები, ჩვენი წარმომადგენლების ბულინგი მიმდინარეობს „ნაცმოძრაობის“ ტელევიზიების ჟურნალისტების მხრიდან. მინდა ამასთან დაკავშირებით კონკრეტული ინფორმაცია მოგცეთ, რომ კანონის შესაბამისად, ყველა წარმომადგენელს რომელი პარტიის წარმომადგენელიც არ უნდა იყოს, აქვს უფლება, თუ ის იცავს 100-მეტრიან დისტანციას, გასწიოს აგიტაციაც კი, არათუ ჰქონდეს სიები, რომელიც მოიპოვება ცესკოს საიტზე და ღია წყაროებში, არამედ მოახდინოს ამომრჩევლის მობილიზება და აწარმოოს სააგიტაციო მუშაობა. ამის მიუხედავად, იმის უზრუნველსაყოფად და იმ მიზნით, რომ დაბნეულობა გამოიწვიონ ჩვენს წარმომადგენლებში, „ნაცმოძრაობის“ ტელევიზიების ჟურნალისტები დასდევენ და ცდილობენ ჩვენი წარმომადგენლების ბულინგს და ეკითხებიან მათ, რატომ აქვთ სიები. მართლაც დაფიქსირდა რამდენიმე შემთხვევა იმისა, როდესაც სიებს არ აჩვენებენ ჩვენი წარმომადგენლები, ეს მათი დაბნეულობით აიხსნება, თუმცა ხაზგასმით და კატეგორიულად ვაცხადებ, მათ აქვთ ამ სიების ფლობის და ამით სარგებლობის უფლება. ამიტომ, მოვუწოდებ ყველა ჟურნალისტს, ყველა ტელევიზიას, რომ თავი დაანებონ ამ ადამიანების ბულინგს, იმიტომ, რომ ისინი არაფერს უკანონოს ამ სიებით ქონით და სარგებლობით არ აკეთებენ“,- განაცხადა მდინარაძემ.

ამასთანავე, როგორც მან აღნიშნა, გარემო არის პოლარიზებული და ის თუ ვინ არის ამის წყარო და შემოქმედი, საზოგადოებამ კარგად იცის.

„პოლარიზებულია გარემო და ამისი წყარო და შემოქმედები ჩვენ ძალიან კარგად ვიცით და ამ პოლარიზაციის წყაროს დამარცხება ხდება დღეს. იმ შემთხვევაში თუ ჩვენი ამომრჩეველი მოახდენს და მოახერხებს სრულ მობილიზებას, ჩვენ გარანტირებული გვექნება მოგება 20-ვე საარჩევნო ოლქში და წარმოუდგენელია დავუშვათ, რომ სადმე „ნაცმოძრაობის“ რომელიმე წარმომადგენელმა რაიმე გამარჯვება მოიპოვოს“, - განაცხადა მდინარაძემ.

ფარხად მამედოვი - აზერბაიჯან-სომხეთის მოლაპარაკებები შეიძლება შედგეს თბილისში, მაგრამ იმ შემთხვევაში, თუ ძირითადი მოდერატორი ამერიკა იქნება და არა ევროკავშირი
ქართული პრესის მიმოხილვა 26.01.2023
ჯეიმი ფლაი - უკრაინელებმა მთელი მსოფლიო დაარწმუნეს, რომ მზად არიან დაიცვან თავის ქვეყანა, მიუხედავად საშინელი საფრთხისა, რომლის წინაშეც იდგა უკრაინის ბევრი ოფიციალური პირი და უკრაინელი ხალხი
წიგნი, რომელიც ხელოვნური ინტელექტის მიერ დაიწერა BTU-ში წარადგინეს
SWEFLAND Group ონკოლოგიური დაავადებების მქონე ბავშვებისთვის - ურთიერთშეთანხმების მემორანდუმი სოლიდარობის ფონდთან
IDS ბორჯომსა და საქართველოს სათხილამურო ფედერაციას შორის პარტნიორობის მემორანდუმი გაფორმდა