სუდანში სამხედრო ძალაუფლების წინააღმდეგ მიმდინარე საპროტესტო აქციაზე მომხდარი არეულობის დროს სულ მცირე სამი ადამიანი გარდაიცვალა. ამის შესახებ ინფორმაციას BBC ავრცელებს.

ექიმების ცენტრალური კომიტეტის ცნობით, სუდანის უსაფრთხოების ძალებმა პროდემოკრატიულ მომიტინგეების წინააღმდეგ ცრემლსადენი გაზი და იარაღი გამოიყენეს, რის შედეგადაც სულ მცირე სამი ადამიანი დაიღუპა. აქტივისტების ინფორმაციით კი, დაშავებულია 100-მდე ადამიანი.

სუდანის შინაგან საქმეთა სამინისტრო დემონსტრანტების წინააღმდეგ სროლის ფაქტს უარყოფს და მომიტინგეებს პოლიციაზე თავდასხმაში ადანაშაულებს.

ცნობისთვის, სუდანში სამხედროებმა გარდამავალ მთავრობას ძალაუფლება წაართვეს. ქვეყანაში საგანგებო მდგომარეობაა გამოცხადებული. სამხედრო გადატრიალებას ქუჩის საპროტესტო აქციები მოჰყვა, რის შედეგადაც დაიღუპა სულ მცირე 7 და დაშავდა რამდენიმე ადამიანი.