აშშ-ის პრეზიდენტ ჯო ბაიდენი გაერო-ს კლიმატის ცვლილების კონფერენციაზე შეეცადა მსოფლიო ლიდერები დაერწმუნებინა იმაში, რომ შეერთებული შტატები შეასრულებს თავის დაპირებას და 2030 წლის ბოლომდე სათბურის გაზების გამონაბოლქვს 50 %-ით შეამცირებს.
„ჩემი ადმინისტრაცია გადაჭარბებით მუშაობს იმისთვის, რომ ვაჩვენოთ -კლიმატის ცვლილებებზე ჩვენი ვალდებულება არის მოქმედება და არა სიტყვები,“ - აღნიშნა ჯო ბაიდენმა კონფერენციაზე სიტყვით გამოსვლისას.
ბაიდენმა მოიბოდიშა იმის გამო, რომ მისი წინამორბედის პრეზიდენტობის დროს აშშ-მა პარიზის შეთანხმება დატოვა.
„ბოდიშს ვიხდი იმის გამო, რომ შეერთებული შტატები, წინა ადმინისტრაციის დროს, პარიზის შეთანხმებიდან გამოვიდა“, - აღნიშნა ბაიდენმა.
მისი თქმით, აუცილებელია, რომ განვითარებად ქვეყნებს კლიმატის ცვლილებებთან ბრძოლაში დაეხმარონ.
აშშ-ის პრეზიდენტის განცხადებით, ის გეგმავს კონგრესთან ერთად იმუშაოს იმაზე, რომ 2024 წელს ამოქმედდეს 3 მილიარდი აშშ დოლარის მოცულობის პროგრამა, რომლის მიზანია განვითარებად ქვეყნებს დაეხმაროს, მართონ კლიმატის ცვლილებისგან გამოწვეული შედეგები ადგილობრივი ღონისძიებების მეშვეობით.