ინდოეთი პირობას დებს, რომ სათბური აირების გამოყოფის ნულოვან დონეს 2070 წლისთვის მიაღწევს, - BBC-ის ინფორმაციით, ამის შესახებ ინდოეთის პრემიერ-მინისტრმა, ნარენდრა მოდიმ გლაზგოში მიმდინარე გაერო-ს კლიმატის ცვლილებების სამიტზე განაცხადა.

ამასთან, ინდოეთის პრემიერ-მინისტრმა განაცხადა, რომ 2030 წლისთვის ქვეყანა ენერგიის 50% განახლებადი წყაროებიდან მიიღებს და ამავე წლისთვის ნახშირორჟანგის გამოყოფას ერთი მილიარდი ტონით შეამცირებს.

ინდოეთი მსოფლიოში ნახშირორჟანგის გამოყოფის რაოდენობის მიხედვით მეოთხე ადგილზეა ჩინეთის, აშშ-სა და ევროკავშირის შემდეგ.

ცნობისთვის, ჩინეთი გეგმავს, რომ სათბური აირების გამოყოფა ნულოვან დონემდე 2060 წლისთვის შეამციროს, აშშ და ევროკავშირი კი ნახშირბადის ნეიტრალიტეტის მიღწევას 2050 წლისთვის გეგმავენ.