უკრაინის უმაღლესი რადას კომისარმა ადამიანის უფლებათა საკითხებში ლუდმილა დენისოვამ უკრაინაში საქართველოს ელჩთან, გიორგი ზაქარაშვილთან შეხვედრაზე უკრაინის მოქალაქეებისთვის, საქართველოში შესვლისას სასაზღვრო კონტროლის პროცედურის გაჭიანურების საკითხი განიხილა.

დენისოვა სოციალურ ქსელ „ტელეგრამში“ წერს, რომ ელჩთან შეხვედრისას შეშფოთება გამოთქვა იმის გამო, რომ 2021 წლის ოქტომბრიდან, საქართველოში უკრაინის საელჩო იღებს მოქალაქეთა განცხადებებს საქართველოში სასაზღვრო კონტროლის ხანგრძლივი პროცედურების და უკრაინაში იძულებით დაბრუნების გამო.

ლუდმილა დენისოვას განცხადებით, ეს თავადაც გამოსცადა 26 ოქტომბერს, უკრაინის მოქალაქის, მიხეილ სააკაშვილის მონახულების მიზნით საქართველოში ჩასვლისას, როცა მესაზღვრეებმა 40 - წუთიანი დაყოვნების შემდეგ მისცეს ქვეყანაში შესვლის უფლება. უკრაინის სახალხო დამცველის თანახმად, სასაზღვრო სამსახურს შეფერხების მიზეზი არ განუმარტავს და ყურადღება არც მისი დიპლომატიური პასპორტისთვის მიუქცევია.უკრაინის სახალხო დამცველის ინფორმაციით, ქართულმა მხარემ განმარტების გარეშე ქვეყანაში არ შეუშვა უკრაინის მოქალაქეები, ადვოკატი ევგენ გრუშოვეცი, მიხეილ სააკაშვილის კიევის ოფისის ხელმძღვანელი მარია ბარაბაში და ჟურნალისტები, დმიტრი გორდონი და ოლესია ბაცმანი.

ლუდმილა დენისოვას განცხადებით, საქართველოს ელჩთან შეხვედრისას ხაზი გაუსვა, რომ საქართველოს მხრიდან მსგავსი ქმედებების განმარტებებს ელოდება.