რუსთავის N12 პენიტენციურ დაწესებულებასთან მიხეილ სააკაშვილის მხარდამჭერების აქცია დასრულდა. ­მათი თქმით, აქცია ყოველდღიურ რეჟიმში გაგრძელდება. ამასთან, მომიტინგეთა ნაწილი დღეს რუსთავის ციხესთან მთელი ღამის განმავლობაში დარჩება.

"ჩვენ აღარაფერი დაგვრჩენია პროტესტის გარდა, მხოლოდ ეს არის ჩვენს არსენალში და ამით უნდა დავამარცხოთ "ქართული ოცნება". ამიტომ მადლობა თითოეულ თქვენგანს აქ მობრძანებისათვის, მადლობა თითოეულ თქვენგანს იმისათვის, რომ ხვალაც, ზეგაც და ყოველდღიურ რეჟიმში გავაგრძელებთ პროტესტს და არა მხოლოდ რუსთავის ციხესთან.

დღეს მივდივართ იმიტომ, რომ ხვალ კიდევ უფრო მეტი მოვიდეთ და კიდევ უფრო მეტად და მწვავედ გამოვხატოთ ჩვენი სამართლიანი პროტესტი და პუტინ-ივანიშვილის უკანონო ტყვეობისაგან ვიხსნათ საქართველოს მესამე პრეზიდენტი", - განაცხადა "ნაციონალური მოძრაობის" წევრმა გიორგი კაპანაძემ.