თბილისის საქალაქო სასამართლოში მედიასაშუალებების მიმართ განხორციელებულ ფიზიკურ ძალადობაში ბრალდებული 7 პირის საქმის არსებითი განხილვა დაიწყო.

დაკავებულ პირებს საინფორმაციო სააგენტო „ინტერპრესნიუსის" ფოტოგრაფ გიორგი ნიკოლიშვილსა და „ტვ პირველის" ოპერატორ ლევან ბრეგვაძეზე ფიზიკურ ძალადობას ედავებიან.

დღევანდელ სასამართლო სხდომაზე მხარეები შესავალ სიტყვებს წარმოთქვამენ.

პროცესს ესწრებიან ბრალდებულებიც, ისინი წარდგენილ ბრალდებაში თავს დამნაშავედ არ მიიჩნევენ.

ცნობისთვის, რუსთაველის გამზირზე, მედიასაშუალებების წარმომადგენელთა მიმართ განხორციელებული ძალადობრივი ქმედებებზე და პროფესიულ საქმიანობაში ხელის შეშლის ფაქტებზე გამოძიება სისხლის სამართლის კოდექსის 154-ე (ჟურნალისტისთვის პროფესიულ საქმიანობაში უკანონოდ ხელის შეშლა) და 126-ე (ძალადობა) მუხლებით მიმდინარეობს.

ეპიზოდზე, რომელშიც 27 ბრალდებულია, 53 დაზარალებულია. საერთო ჯამში საქმეს 31 ბრალდებული და 57 დაზარალებული ჰყავს, მათგან ერთი იურიდიული პირია.