პორტუგალიის პრეზიდენტმა მარსელუ რებელუ დი სოუზამ, რომელმაც პარლამენტი დაითხოვა, ვადამდელი საპარლამენტო არჩევნები 30 იანვარს დანიშნა.
ქვეყანა პოლიტიკურ კრიზისში გასულ კვირას აღმოჩნდა, როდესაც პარლამენტმა პრემიერ-მინისტრ ანტონიო კოსტას მიერ შეთავაზებული სახელმწიფო ბიუჯეტის პროექტი არ დაამტკიცა.
აღსანიშნავია, რომ ეს პირველი შემთხვევა იყო პორტუგალიაში 1974 წლის შემდეგ, როდესაც საკანონმდებლო ორგანომ ბიუჯეტს მხარი არ დაუჭირა.
პრეზიდენტმა სატელევიზიო მიმართვისას განაცხადა, რომ ამ მარცხმა „მთლიანად შეამცირა მთავრობის მიმართ მხარდაჭერის საფუძველი“. მისი თქმით, 2022 წელი გადამწყვეტი წელი იქნება ქვეყნის პანდემიიდან და სოციალური კრიზისიდან გამოსასვლელად.