ჩინეთის ტაივანთან ურთიერთობის ოფისის სპიკერის განცხადებით, ჩინეთში ყველა ადამიანისთვის, ვინც ტაივანის დამოუკიდებლობას უჭერს მხარს, დაკისრებული სისხლის სამართლის პასუხისმგებლობა უვადოდ იქნება ძალაში. ამის შესახებ ინფორმაციას Reuters ავრცელებს.

გამოცემის ცნობით, ეს არის პირველი შემთხვევა, როდესაც ჩინეთი რაიმე სახის სასჯელს აწესებს იმ ადამიანებისთვის, ვინც მათგან გამოყოფილი ტაივანის დამოუკიდებლობას უჭერს მხარს.

ტაივანთან ურთიერთობის ოფისში აცხადებენ, რომ მათ იმ ადამიანების სია აქვთ , რომლებიც პრო-ტაივანური დამოკიდებულებით გამოირჩევიან და სადაც ტაივანის პრემიერი, პარლამენტის სპიკერი და საგარეო საქმეთა მინისტრი უკვე ჰყავთ შეყვანილი. ისინი აღნიშნავენ, რომ სიაში მყოფი ადამიანები ჩინეთისა და ასევე ჰონგ -კონგისა და მაკაუს სპეციალური ადმინისტრაციული რეგიონების ტერიტორიაზე შესვლას ვერ შეძლებენ.

შავ სიაში შეყვანილ ადამიანებს არ ექნებათ ასევე უფლება ითანამშრომლონ ჩინეთიდან ჩასულ ადამიანებთან ან კომპანიებთან და სუბიექტებთან, რომლებიც მათ აფინანსებენ და რომლებისგანაც ისინი მატერიალურ მხარდაჭერას იღებენ.