ბოლო დღეების მანძილზე კორონავირუსით დაინფიცირების შემთხვევების ზრდის გამო დანიაში „კოვიდ-საშვები“ ხელახლა დაწესდება. Euronews-ის ინფორმაციით, უკვე 5 დღეა, რაც ქვეყანაში ყოველდღიურად დაინფიცირებულთა რაოდენობა 2 000-ს აღემატება.

დანიის პრემიერ-მინისტრის მეთე ფრედერიკსენის განცხადებით, საშვების თავიდან დაწესება აუცრელი ადამიანებისთვის სირთულეებს წარმოქმნის და მათ ვაქცინაციისკენ უბიძგებს.

დანია ერთ-ერთი პირველი ქვეყანა იყო მსოფლიოში, სადაც რესტორნებში, კაფეებში, სპორტულ დარბაზებში, ღამის კლუბებსა და სხვა დაწესებულებებში ე.წ. „კოვიდ-საშვების“ წარდგენა სავალდებულო გახდა. თუმცა დაინფიცირების შემთხვევების შემცირების ფონზე რეგულაციები 10 სექტემბრიდან გაუქმდა. ბოლო მონაცემებით, დანიაში 12 წელს ზემოთ მოსახლეობის 85.9% ორი დოზით არის ვაქცინირებული.