აშშ-ის მთავრობა 1 მილიარდი აშშ დოლარის ღირებულების, „მოლნუპირავირს“ შეიძენს, რომელსაც, დამტკიცების შემთხვევაში, კორონავირუსის სამკურნალოდ გამოიყენებენ, - ამის შესახებ პრეპარატის შემქმნელმა კომპანიებმა Merck-მა და Ridgeback Biotherapeutics-მა განაცხადეს.
Reuters-ის ინფორმაციით, აშშ-ის მთავრობამ ივნისში მიაღწია შეთანხმებას მედიკამენტის 1.7 მილიონი კურსისთვის საჭირო რაოდენობის შეძენასთან დაკავშირებით, რომლის საერთო ღირებულებაც 1.2 მილიარდი აშშ დოლარია, ახლახანს კი მიიღო გადაწყვეტილება, დამატებით შეიძინოს 1.4 მილიონი კურსისთვის საკმარისი რაოდენობის მედიკამენტი, რაშიც 1 მილიარდი აშშ დოლარის გადახდა მოუწევს. ეს იმას ნიშნავს, რომ აშშ, ჯამში, „მოლნუპირავირის“ 3.1 მილიონი კურსისთვის საჭირო მარაგს შეისყიდის, რომლის საერთო ღირებულებაც 2.2 მილიარდი აშშ დოლარია.
აშშ-ის სურსათისა და მედიკამენტების ადმინისტრაციის დამოუკიდებელ ექსპერტთა კომიტეტი Merck-ის განაცხადს „მოლნუპირავირის“ დამტკიცების შესახებ 30 ნოემბერს განიხილავს, რის შემდეგაც, სავარაუდოდ, მარეგულირებელი გადაწყვეტილებას მიიღებს.
აღსანიშნავია, რომ რამდენიმე დღის წინ გაერთიანებული სამეფო პირველი ქვეყანა გახდა მსოფლიოში, რომელმაც „მოლნუპირავირის“ კოვიდ-19-ის სამკურნალოდ გამოყენება დაამტკიცა.
შეგახსენებთ, „მოლნუპირავირზე“ ჩატარებულმა კლინიკურმა კვლევებმა აჩვენა, რომ პრეპარატმა, რომელიც, თავდაპირველად, გრიპის სამკურნალოდ შეიქმნა, დაინფიცირების პირველივე დღეებიდან მიღების შემთხვევაში კოვიდპაციენტებში ჰოსპიტალიზაციის ან სიკვდილის რისკი დაახლოებით გაანახევრა.