გერმანიაში, ბოლო 24 საათში, კორონავირუსით ინფიცირების 50 196 ახალი შემთხვევა გამოვლინდა, რაც რეკორდულად მაღალი დღიური მაჩვენებელია ქვეყნისთვის პანდემიის დაწყების დროიდან, - ინფორმაციას „დოიჩე ველე“ „რობერტ კოხის ინსტიტუტზე“ დაყრდნობით ავრცელებს.

ამასთან, ავადობის შვიდდღიანმა კოეფიციენტმა, რომელიც ყოველ 100 000 მოსახლეზე დაინფიცირების ახალი შემთხვევების რაოდენობას ასახავს, ქვეყანაში 249.1-ს მიაღწია, რაც ასევე რეკორდულად მაღალი მაჩვენებელია პანდემიის დაწყების დროიდან.

„დოიჩე ველე“ წერს, რომ ინფიცირების მზარდმა ტემპმა გერმანიის ჯანდაცვის ოფიციალური პირები და პოლიტიკური ლიდერები შეაშფოთა. კანცლერი ანგელა მერკელი რეგიონების პრემიერებთან მოლაპარაკებებს გეგმავს, რათა კრიზისის წინააღმდეგ "სწრაფი და ერთიანი რეაგირება“ განახორციელონ.