აშშ-სა და ჩინეთის პრეზიდენტები, ჯო ბაიდენი და სი ძინპინი აზია-წყნარი ოკეანის ეკონომიკური თანამშრომლობის (APEC) ფარგლებში რეგიონის სავაჭრო და გეოპოლიტიკურ პრობლემებს განიხილავენ.
Reuters-ის ინფორმაციით, ფორუმის 21 წევრი სახელმწიფოს წარმომადგენელი შეხვედრას დღეს ონლაინ რეჟიმში გამართავს.
„მოლაპარაკებებში უშუალოდ აშშ-ის პრეზიდენტის ჩართულობა იმაზე მიუნიშნებს, რომ აშშ-ს რეგიონში სტაბილურობის მისაღწევად საკუთარი წვლილის შეტანა სურს“, - ნათქვამია თეთრი სახლის განცხადებაში.
სი ძინპინის თქმით, აზია-წყნარი ოკეანის რეგიონში დაძაბულობის მოხსნა აუცილებელია, რათა მისი წევრი ქვეყნები „ცივი ომის“ მდგომარეობას არ დაუბრუნდნენ.
აზია-წყნარი ოკეანის ეკონომიკური თანამშრომლობა (APEC) მთავრობათაშორისი ფორუმია, რომელიც 1989 წელს დაარსდა. მის წევრებს შორის აშშ, რუსეთი, კანადა, ჩინეთი, ავსტრალია და იაპონია არიან.