ავღანეთში, ნანგარჰარის პროვინციის მეჩეთში პარასკევის ლოცვის დროს აფეთქება მოხდა, რის შედეგადაც მინიმუმ 12 ადამიანი დაშავდა, - ინფორმაციას „ალ-ჯაზირა“ „თალიბანის“ წარმომადგენლებზე დაყრდნობით ავრცელებს.
ამასთან, „თალიბანის“ წარმომადგენელმა, რომელმაც ვინაობის გამჟღავნება არ ისურვა, „ფრანს-პრესთან“ საუბარში განაცხადა, რომ აფეთქების შედეგად არიან დაღუპულები და დაშავებულები. ადგილობრივი საავადმყოფოს ექიმმა კი სააგენტოსთან საუბარში აღნიშნა, რომ დაღუპულია სამი ადამიანი.
გავრცელებული ინფორმაციით, ასაფეთქებელი მოწყობილობა მეჩეთში იყო დამონტაჟებული.
მომხდარზე პასუხისმგებლობა ჯერჯერობით არავის აუღია.
შეგახსენებთ, ნოემბრის დასაწყისში ქაბულის მეჩეთში მომხდარ აფეთქებას 19 ადამიანი ემსხვერპლა, 50-ზე მეტი კი - დაშავდა. თავდასხმაზე პასუხისმგებლობა დაჯგუფება „ისლამურმა სახელმწიფო - ხორასანმა“ აიღო.