ლივერპულში, ქალთა საავადმყოფოსთან მომხდარი აფეთქების შემდეგ, სამართალდამცავებმა ტერორიზმის ბრალდებით სამი მამაკაცი დააკავეს.

BBC-ის ინფორმაციით, კონტრტერორისტული პოლიციის დეტექტივებმა განაცხადეს, რომ 29, 26 და 21 წლის მამაკაცები ქალაქის კენსინგტონის რაიონში დააკავეს.

მათი თქმით, გრძელდება მუშაობა და საგამოძიებო ქმედებები იმისთვის, რომ აფეთქების მიზეზი დაადგინონ.

ცნობისათვის, ლივერპულში ტაქსი აფეთქდა, რომელსაც ერთი მგზავრი გადაჰყავდა. აფეთქების შედეგად მგზავრი შემთხვევის ადგილზე გარდაიცვალა, მძღოლი კი - დაშავდა და საავადმყოფოში გადაიყვანეს. მისი ჯანმრთელობის მდგომარეობა სტაბილურია.

მომხდარს გაერთიანებული სამეფოს პრემიერ-მინისტრი ბორის ჯონსონი გამოეხმაურა.

„მინდა მადლობა გადავუხადო სასწრაფო დახმარების სამსახურს სწრაფი რეაგირებისა და პროფესიონალიზმისთვის, პოლიციას კი ჩატარებული სამუშაოსა და მიმდინარე გამოძიებისთვის,“- დაწერა ჯონსონმა „ტვიტერზე“.

გაერთიანებული სამეფოს შინაგან საქმეთა მინისტრის, პრიტი პატელის განცხადებით კი ინციდენტთან დაკავშირებით განახლებულ ინფორმაციას რეგულარულად აწვდიან.