ჩვენ სულ უფრო მეტ ყურადღებას ვუთმობთ ჩვენს აღმოსავლეთ პარტნიორობას, რადგან როგორც იცით, სიტუაცია ამ რეგიონში უფრო რთული გახდა, - ამის შესახებ ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში ჟოზეფ ბორელმა ბრიუსელში, საგარეო საქმეთა მინისტრების შეხვედრის დაწყებამდე განაცხადა, რითაც მან უპასუხა ჟურნალისტის შეკითხვას, ფიქრობს თუ არა, რომ აღმოსავლეთ პარტნიორობა არსებობას წყვეტს.
„აღმოსავლეთ პარტნიორობა არსებობას წყვეტს? ვფიქრობ, პირიქით, ჩვენ სულ უფრო მეტ ყურადღებას ვაქცევთ ჩვენს აღმოსავლეთ პარტნიორებს. რა თქმა უნდა ეს არ ეხება ბელარუსს, რომელიც არ იქნება დღევანდელი შეხვედრის ნაწილი, თუმცა ჩვენ ვემზადებით მომავალი სამიტისთვის. ჩვენ სულ უფრო მეტ და მეტ ყურადღებას ვუთმობთ ჩვენს აღმოსავლეთ პარტნიორობას, რადგან როგორც იცით, სიტუაცია იქ რთული გახდა ჰიბრიდული თავდასხმების, გაზის, მიგრანტების იარაღად გამოყენებით. ამ მომენტისთვის ეს არის ჩვენი საგარეო პოლიტიკის ყველაზე მნიშვნელოვანი ნაწილი“, – განაცხადა ჟოზეფ ბორელმა.