კრემლის განცხადებით, რუსეთი მზადაა, მიგრანტთა კრიზისის პროცესში შუამავლის როლი შეასრულოს. ამის შესახებ ინფორმაციას Reuters-ი კრემლის პრესსპიკერის დიმიტრი პესკოვის განცხადებაზე დაყრდნობით ავრცელებს.
ევროკავშირი ბელარუსს ათასობით მიგრანტის საზღვრისკენ გადაყვანით ,,ჰიბრიდულ თავდასხმაში“ ადანაშაულებს.
ვლადიმერ პუტინი არსებულ კრიზისში მის როლსა და მონაწილეობას უარყოფს.
„როდესაც გვესმის განცხადება ან ბრალდება ჩვენი მისამართით, მინდა ყველას ვუთხრა: დაკავდით თქვენი შიდა პრობლემებით, ნურავის გადააბარებთ საკუთარ საკითხებს, რომელთა გადაწყვეტა თქვენს შესაბამის უწყებებს ეკუთვნის“, - აღნიშნა პრეზიდენტმა.
ჟურნალისტებთან საუბრისას, პესკოვმა ასევე უარყო და "არასწორი" უწოდა აშშ-ს სახელმწიფო დეპარტამენტის განცხადებას, რომ ბელორუსის ქმედებები ევროკავშირის საზღვარზე მიზნად ისახავს ყურადღების გადატანას რუსული სამხედრო მოქმედებებისგან უკრაინასთან ახლოს.
შეგახსენებთ, კვირას , ვლადიმერ პუტინმა ბელარუსი-ევროკავშირის საზღვართან შექმნილი საიმიგრაციო კრიზისის გადაწყვეტაში დახმარების აღმოსაჩენად მზადყოფნა გამოთქვა.