სუდანში გამართული საპროტესტო აქციების დროს უსაფრთხოების ძალებმა მინიმუმ 15 ადამიანი მოკლეს და ათობით პირი დაჭრეს.
Reuters-ი თვითმხილველებზე დაყრდნობით იუწყება, რომ უსაფრთხოების ძალებმა დემონსტრანტების წინააღმდეგ ნამდვილი ტყვიები და ცრემლსადენი გაზი გამოიყენეს.
მანამდე, სუდანის დედაქალაქ ხარტუმის მთავარ გზაზე მომიტინგეებმა დაწვეს საბურავები და სკანდირებდნენ: "ხალხი ძლიერია და უკან დახევა შეუძლებელია".
მომიტინგეების ნაწილს ხელში ეჭირა საპროტესტო აქციების დროს მოკლული ადამიანების და სამხედრო გადატრიალების დროს გადაყენებული პრემიერ-მინისტრის, აბდალა ჰამდოკის ფოტოები.
25 ოქტომბერს მომხდარ სამხედრო გადატრიალებას სუდანის სხვადასხვა ქალაქში აპროტესტებენ. მომიტინგეები ძალაუფლების სამოქალაქო ხელისუფლებისთვის გადაცემას და გადატრიალების ლიდერების გასამართლებას მოითხოვენ.