რუსეთის თავდაცვის სამინისტრომ სომხეთსა და აზერბაიჯანს შორის საზღვრების დელიმიტაციისა და დემარკაციის მოსამზადებელი ეტაპის შესახებ 17 ნოემბერს ახალი წინადადებები შემოგვთავაზა,- ამის შესახებ სომხეთის პრემიერ-მინისტრმა ნიკოლ ფაშინიანმა განაცხადა.

„გუშინ პარლამენტში ვთქვი, რომ მაისიდან მოყოლებული რუსეთიდან იყო სამი წინადადება სომხეთსა და აზერბაიჯანს შორის საზღვრების დელიმიტაციისა და დემარკაციის შესახებ და სამივე ჩვენთვის ძირითადად მისაღები იყო და კვლავაც მისაღებია. გუშინდელი ჩემი განცხადებების შემდეგ, რუსეთის ფედერაციის თავდაცვის სამინისტრომ შემოგვთავაზა წინადადებები დელიმიტაციისა და დემარკაციის მოსამზადებელ ფაზასთან დაკავშირებით. კიდევ ერთხელ მინდა აღვნიშნო, რომ ეს წინადადებები ჩვენთვის მისაღებია“, - განაცხადა ფაშინიანმა.

სომხეთის პრემიერ-მინისტრმა თავდაცვის მინისტრს, სურენ პაპიკიანს დაავალა, წინადადებების განხორციელებასთან დაკავშირებით დეტალები რუსეთის თავდაცვის მინისტრ სერგეი შოიგუსთან დააზუსტოს.