გამოდით ქუჩაში, დავდგეთ ერთ წერტილში და ხელისუფლებას ვუთხრათ უარი - ხელისუფლებას ვუთხრათ, რომ ცხოვრების ასე გაგრძელება, არ შეიძლება, - ამის შესახებ „ერთიანი ნაციონალური მოძრაობის“ წევრმა, მურმან დუმბაძემ გლდანში, #18 პენიტენციურ დაწესებულებასთან ჟურნალისტებს განუცხადა.
მისი თქმით, არ არსებობს ისეთი სახელმწიფო, საქართველოს გარდა, რომელიც პატიმარს ასე ექცევა.
„არ ვიცი, არის თუ არა დედამიწის ზურგზე სახელმწიფო, რომელიც პატიმარს ასე ექცევა. რა გინდ ნეგატიური, ავტორიტარული, დიქტატორული იყოს, რუსეთიც კი. ნავალნის სასამართლო ღია პროცესი იყო. როდესაც შიმშილობა დაიწყო, იზრუნა, რომ გამოეყვანა მდგომარეობიდან. არ მეგულება ისეთი სახელმწიფო დედამიწაზე, როგორიც არის საქართველო. ეს არის უკიდურესად აღმაშფოთებელი. არ შეიძლება კაცი სასამართლო პროცესზე არ მოუშვა, არც სატელეფონო საუბრის უფლება მისცე.
მაღალი კლასის პროფესიონალები ამბობენ, რომ ის სასწრაფოდ სამოქალაქო კლინიკაშია გადასაყვანი და ამ საქმის გამოსწორება შეუძლია მხოლოდ ერთადერთ უზენაესს, ეს არის საქართველოს მოქალაქე. დიქტატურა არ მარცხდება საარჩევნო ბიულეტენით და არ მარცხდება მიკროფონთან ლაპარაკით. გამოდით ქუჩაში, დავდგეთ ერთ წერტილში და ხელისუფლებას ვუთხრათ უარი, ხელისუფლებას ვუთხრათ, რომ ცხოვრების ასე გაგრძელება არ შეიძლება. არ შეიძლება ცოცხლი ადამიანი, საქართველოს მესამე პრეზიდენტი ცოცხლად შეჭამო და მოკლა. არ შეიძლება, რომ რაიმე მოუვიდეს. გარწმუნებთ, გაძლევთ 1000%-იან გარანტიას, საქართველო იქცევა ნაწლავებად, ეს მითქვამს ივანიშვილი შენთვის და დანარჩენი შენ გაიგე“, - განაცხადა მურმან დუმბაძემ.