ბელარუსიდან ერაყში 430 მიგრანტი დააბრუნეს, - ინფორმაციას მედია საშუალებები ერაყის საგარეო საქმეთა სამინისტროზე დაყრდნობით ავრცელებენ.

მათივე ინფორმაციით, თვითმფრინავი, რომლის ბორტზეც მიგრანტები, ძირითადად ერაყელი ქურთები იმყოფებოდნენ, ჯერ ერაყში, ქურთისტანის ავტონომიურ რეგიონ ერბილში დაეშვა, იქიდან კი დედაქალაქ ბაღდადში გაემგზავრა, სადაც დანარჩენი მიგრანტები ჩაიყვანა.

ერაყის ხელისუფლებამ საკუთარ მოქალაქეებს დაბრუნებისკენ მოუწოდა და განუცხადა, რომ ევროკავშირისკენ მიმავალი გზა ჩაკეტილია.

შეგახსენებთ, ბელარუსის პრეზიდენტმა ალექსანდრე ლუკაშენკომ და გერმანიის კანცლერის მოვალეობის შემსრულებელმა ანგელა მერკელმა მიმდინარე კვირაში ორი სატელეფონო საუბარი გამართეს. მხარეებმა ხაზგასმით აღნიშნეს, რომ მიგრანტებს გაეროს ლტოლვილთა უმაღლესი კომისარიატისა და მიგრაციის საერთაშორისო ორგანიზაციის დახმარებით თავიანთ ქვეყნებში დაბრუნების საშუალება უნდა მიეცეთ.