ესპანეთის ქალაქ ლა-კორუნიას აეროპორტში სამგზავრო თვითმფრინავიდან მგზავრების ევაკუაცია მას შემდეგ განხორციელდა, რაც ხელისუფლებამ მასში ასაფეთქებელი მოწყობილობის არსებობის შესახებ მუქარა მიიღო, - ინფორმაციას Reuters-ი ადგილობრივ სამართალდამცავებზე დაყრდნობით ავრცელებს.
გავრცელებული ინფორმაციით, თვითმფრინავი შიდა, ბილბაო-ლა კორუნიას რეისს ასრულებდა.
„თვითმფრინავის დაჯდომის შემდეგ ყველა მგზავრის ევაკუაცია განხორციელდა, მისი დათვალიერება კი აეროპორტის შენობებისგან მოშორებით მიმდინარეობს,“- განაცხადა აეროპორტის ოპერატორი კომპანია Aena-ს წარმომადგენელმა.
მათივე ინფორმაციით, 2-საათიანი დათვალიერების შედეგად თვითმფრინავში საეჭვო ვერაფერი აღმოაჩინეს.
ამ დროისთვის, ლა-კორუნიას აეროპორტი ჩვეულ რეჟიმში აგრძელებს მუშაობას.