„ნიუ ჰოსპიტალსის“ რეანიმატოლოგი, ალექსანდრე მხარგრძელი აცხადებს, რომ ამ დროისთვის „დროას“ ლიდერის, დეპუტატ ელენე ხოშტარიას სამედიცინო კვლევების პასუხებს ელოდებიან.

რაც შეეხება შიმშილობის შეწყვეტის შემდეგ რეაბილიტაციის პროცესს, ექიმის განმარტებით, ეს შეიძლება რამდენიმე კვირის განმავლობაში გაგრძელდეს.

„რეაბილიტაცია მოიცავს ინტრავენულ გადასხმებს, ვიტამინოთერაპიებს, ელექტროლიტურ კორექციას და ა.შ. პრევენციული ღონისძიებები უკვე მიმდინარებს, ველოდებით ანალიზებს და ამის მიხედვით მოხდება ანალიზებს კორექცია. [რეაბილიტაციის პროცესი] შესაძლოა იყოს რამდენიმე დღიდან რამდენიმე კვირამდე, გააჩნია ანალიზებს“, - განაცხადა ალექსანდრე მხარგრძელმა.

ცნობისათვის, დეპუტატმა, ელენე ხოშტარიამ შიმშილობა შეწყვიტა. მისი განცხადებით, ყოფილი პრეზიდენტის, მიხეილ სააკშვილის გორის სამხედრო ჰოსპიტალში გადაყვანა გახდა ამ გადაწყვეტილების საფუძველი.

შეგახსენებთ, ელენე ხოშტარიამ პარლამენტის შენობაში 17 დღის განმავლობაში იშიმშილა.