ბაქომ სომხეთს სამი ჯარისკაცის ცხედარი გადასცა, რომლებიც სამშაბათს აზერბაიჯან-სომხეთის საზღვარზე დაიღუპნენ. ამის შესახებ არაღიარებული მთიანი ყარაბაღის საგანგებო სიტუაციათა სამსახური იუწყება.
16 ნოემბერს ერევანში განაცხადეს, რომ აზერბაიჯანის შეიარაღებულმა ძალებმა განახორციელეს თავდასხმა სომხეთის აღმოსავლეთ საზღვრის მიმართულებით და შეიჭრნენ კილისალის მთის რაიონში. სომხეთის თავდაცვის სამინისტროს ინფორმაციით, სომხეთის ერთი სამხედრო მოსამსახურე გარდაიცვალა, 13 კი ტყვედ ჩავარდა. კიდევ 24 სამხედროსთან კავშირის დამყარება ვერ ხერხდებოდა.
თავის მხრივ, აზერბაიჯანის თავდაცვის სამინისტრომ განაცხადა, რომ სომხეთთან საზღვარზე შვიდი აზერბაიჯანელი ჯარისკაცი გარდაიცვალა, ათი კი დაიჭრა.