გერმანიის ჯანდაცვის მინისტრის, იენს შპანის განცხადებით, კორონავირუსის შემთხვევების სწრაფი ზრდა ნიშნავს, რომ ქვეყანაში ყველა, ვინც არ არის ვაქცინირებული, კოვიდ-19 -ით, სავარაუდოდ, ზამთრის ბოლომდე დაინფიცირდება და ზოგიერთი მათგანი დაიღუპება.
მინისტრმა გერმანელებს ვაქცინაციისკენ მოუწოდა. იმ ადამიანებს კი, რომლებმაც აცრა 6 თვეზე მეტი ხნის წინ ჩაიტარეს - ე.წ. „ბუსტერ“ დოზის მიღებისკენ.
„ზამთრის ბოლომდე გერმანიაში თითქმის ყველა იქნება ვაქცინირებული, ან ვირუსგადატანილი, ნაწილი კი - დაღუპება“, - განუცხადა შპანმა ჟურნალისტებს.
მისი თქმით, ზოგიერთი ამ შეხედულებას ცინიკურად აფასებს.
"მაგრამ ეს სიმართლეა. უაღრესად გადამდები „დელტა“ ვარიანტის გათვალისწინებით ეს სრულიად, სრულიად შესაძლებელია და ამიტომ გირჩევთ ვაქცინაციას ასე სასწრაფოდ“, - აღნიშნა შპანმა.
ოფიციალური მონაცემებით, გერმანიაში, გასული 24 საათის განმავლობაში, კორონავირუსის 30 000-ზე მეტი შემთხვევა გამოვლინდა. საავადმყოფოები აცხადებენ, რომ რეანიმაციული განყოფილებები თითქმის გადატვირთულია.