საქართველოს გენერალური პროკურორი ირანის ელჩს შეხვდა
საქართველოს გენერალური პროკურორი ირაკლი შოთაძე ირანის ისლამური რესპუბლიკის ელჩს აქბარ ღასემი ალი აბადის შეხვდა.
გენერალურ პროკურატურაში გამართულ გაცნობითი ხასიათის შეხვედრას გენერალური პროკურორის მოადგილე ნათია მერებაშვილი და ირანის ისლამური რესპუბლიკის საელჩოს წარმომადგენლები ესწრებოდნენ.
„საქართველოს გენერალურმა პროკურორმა ირანის ისლამური რესპუბლიკის ელჩს პროკურატურის ორგანოების ძირითადი ფუნქციები, მუშაობის სპეციფიკა და საქმიანობის თავისებურებები გააცნო.
შეხვედრაზე ასევე ისაუბრეს ორ ქვეყანას შორის არსებულ სამართლებრივ ურთიერთობებზე.
შეხვედრის დასასრულს, მხარეებმა მომავალში თანამშრომლობის გაღრმავების მზაობა გამოთქვეს“,- აღნიშნულია გავრცელებულ ინფორმაციაში.
