ბელარუსის ოპოზიციის ლიდერი სვეტლანა ტიხანოვსკაია აცხადებს, რომ გერმანიის კანცლერ ანგელა მერკელსა და ბელარუსის პრეზიდენტ ალექსანდრე ლუკაშენკოს შორის სატელეფონო საუბრის გამართვა „ძალიან უცნაურია“, - ინფორმაციას „დოიჩე ველე“ ავრცელებს.

მისი თქმით, ევროკავშირის ლიდერებმა ლუკაშენკოსთან ყოველგვარი კონტაქტისგან თავი უნდა შეიკავონ. ამასთან, ტიხანოვსკაიას განმარტებით, ის აცნობიერებს რომ მერკელი ლუკაშენკოს „საზღვრებზე სიტუაციის დეესკალაციის მიზნით“ ესაუბრა.

აღნიშნული კომენტარის შემდეგ ანგელა მერკელი სვეტლანა ტიხანოვსკაიას ტელეფონით ესაუბრა. გერმანიის მთავრობის პრესსპიკერის, შტეფან ზიბერტის განცხადებით, კანცლერმა ხაზი გაუსვა ფედერალური მთავრობის მუდმივ მხარდაჭერას ბელარუსის დემოკრატიული მოძრაობის მიმართ და აღნიშნა, რომ ლუკაშენკოს მთავრობამ ოპოზიციისა და დამოუკიდებელი ჟურნალისტების წინააღმდეგ ზეწოლის განხორციელება უნდა შეწყვიტოს და პოლიტპატიმრები გაათავისუფლოს.

შეგახსენებთ, გასულ კვირას ალექსანდრე ლუკაშენკომ და ანგელა მერკელმა ტელეფონით ორჯერ ისაუბრეს და ბელარუსი-პოლონეთის საზღვარზე არსებული კრიზისი განიხილეს.