ევროკომისიის ხელმძღვანელის, ურსულა ფონ დერ ლაიენის განცხადებით, ევროკავშირი გეგმავს, შექმნას სპეციალური სია, რათა თვალყური ადევნოს და აღკვეთოს იმ შუამავალი კომპანიების საქმიანობა, რომლებიც ბელარუსში მიგრანტების უკანონოდ გადაყვანას უწყობენ ხელს.

მისი თქმით, ევროპარლამენტის დეპუტატებს შესთავაზებს რეგულაციას, იმისთვის, რომ „შავ სიაში შეიყვანონ ყველა სატრანსპორტო საშუალება, რომელიც დაკავშირებულია ტრეფიკინგსა და მიგრანტთა უკანონო გადაყვანაში“.

„შევთანხმდით, რომ ამ ქცევის წინააღმდეგ საბრძოლველად მნიშვნელოვანია სანქციების კოორდინაცია და მუშაობა წარმოშობის ქვეყნებთან და ავიაკომპანიებთან, რომლებსაც მიგრანტებს მინსკში გადაჰყავთ,“- აღნიშნა ურსულა ფონ დერ ლაიენმა.

ისი თქმით, ბრიუსელი სოლიდარობას უცხადებს ევროკავშირის წევრ ქვეყნებს -პოლონეთს, ლატვიას და ლიეტუვას. ევროკომისიის ხელმძღვანელმა ხაზი გაუსვა, რომ ევროპის აღმოსავლეთ საზღვარზე მიგრანტების კრიზისი არ არსებობს, არამედ ეს არის ბელარუსის მცდელობა, განახორციელოს "ბლოკის დესტაბილიზაცია”.

ურსულა ფონ დერ ლაიენის განცხადებით, ევროკავშირი, ამერიკის შეერთებული შტატები, კანადა და დიდი ბრიტანეთი ბელარუსის წინააღმდეგ სანქციების ახალი პაკეტის შეთანხმების პროცესში არიან.