ევროპის რამდენიმე ქვეყანაში კორონავირუსით ინფიცირების რეკორდულად მაღალი დღიური რაოდენობა დაფიქსირდა, - ინფორმაციას BBC-ი ავრცელებს.

გამოცემის ცნობით, სლოვაკეთში, რომლის მოსახლეობაც, დაახლოებით 5.5 მილიონს შეადგენს, ბოლო 24 საათში ინფიცირების 10 315 ახალი შემთხვევა გამოვლინდა.

ქვეყნის მთავრობა დღეს მოკლევადიანი „ლოქდაუნის“ გამოცხადების საკითხს განიხილავს. სლოვაკეთის პრეზიდენტმა, ზუზანა ჩაპუტოვამ განაცხადა, რომ „ლოქდაუნის“ დაწესება არაპოპულარული, მაგრამ აბსოლუტურად გარდაუვალი ნაბიჯია.“

ინფიცირების 28 380 ახალი შემთხვევა დადასტურდა პოლონეთში, რაც, რეკორდული დღიური მაჩვენებელია ქვეყნისთვის პანდემიის მეოთხე ტალღის დაწყების შემდეგ. ამასთან, გასული დღე-ღამის განმავლობაში პოლონეთში ვირუსს კიდევ 460 ადამიანის სიცოცხლე ემსხვერპლა.

BBC-ის ინფორმაციით, დაინფიცირების რეკორდულად მაღალი დღიური რაოდენობა დაფიქსირდა ჩეხეთშიც, სადაც, პირველად პანდემიის დაწყების შემდეგ, 25 000-ზე მეტი ახალი შემთხვევა გამოვლინდა.