უზენაესი სასამართლოს მოსამართლეების კანდიდატების მოსმენის პროცესის დასაკვირვებლად პარლამენტში მიგვიწვიეს, რაზედაც უარი ვთქვით იმ უბრალო მიზეზის გამო, რომ ეს არის იმ პროცესის ნაწილი, რაზედაც აპრილის შემდეგ ვაკეთებთ კომენტარს და რასთან დაკავშირებითაც გვაქვს წუხილი, რომ არ შეესაბამება 19 აპრილის შეთანხმებას და არც ევროკავშირის მიკროსაფინანსო დახმარების მისაღებად წაყენებულ პირობებს, - ამის შესახებ საქართველოში ევროკავშირის ელჩმა კარლ ჰარცელმა განაცხადა.

მისი თქმით, მოსამართლეების შერჩევის პროცესი უნდა დაპაუზდეს.

„როგორც ვიცით, არსებობს ხარვეზები ვენეციის კომისიის რეკომენდაციასთან კანონმდებლობის სრულ შესაბამისობაში მოყვანასთან დაკავშირებით. ასევე ვნახეთ კანდიდატების წარდგენის პროცესთან დაკავშირებით „ოდირი“-ს შეფასება. ჩვენ ვრჩებით იგივე პოზიციაზე, ჩვენ კვლავ ვფიქრობთ, რომ ის, რაც პროცესში უნდა გაკეთდეს, მისი დაპაუზებაა იმისთვის, რომ გადაიხედოს პროცედურები შემდგომი ქმედებების განხორციელებამდე,“ - აღნიშნა ელჩმა.

მისი თქმით, ახლა სიტუაციის შეფასება და შესაბამისი ქმედების განხორციელება საქართველოს პარლამენტსა და პარლამენტის წევრებზეა.