უკრაინის საგარეო საქმეთა მინისტრი დიმიტრი კულება რუსეთს აფრთხილებს, რომ მის ქვეყანაზე თავდასხმა გამოიწვევს „პოლიტიკურ, ეკონომიკურ და ადამიანურ დანაკარგებს" და ძალიან ძვირი დაჯდება, - ინფორმაციას Reuters-ი ავრცელებს.

„ჩვენ არ ვცდილობთ გამოვიცნოთ, რა უდევს პუტინის თავში. ვმუშაობთ იმისათვის, რომ მას მკაფიოდ ავუხსნათ - უკრაინაზე ახალი თავდასხმა ძალიან ძვირი დაჯდება, ამიტომ ჯობია, ეს არ გააკეთოს“, - აღნიშნა კულებამ.

მისი თქმით, კიევის მთავარი მიზანი "შემდგომი აგრესიული ქმედებების განხორციელებისგან" რუსეთის შეკავებაა.

„მოსკოვმა მკაფიოდ უნდა გაიგოს, რა პოლიტიკურ, ეკონომიკურ და ადამიანურ ზარალს მოიტანს აგრესიის ახალი ეტაპის შემთხვევაში“, - განაცხადა კულებამ.

რუსეთი უკრაინის საზღვართან საკუთარი ძალების რაოდენობას ზრდის, რის გამოც კიევი, შეერთებული შტატები და ნატო გამოთქვამენ შეშფოთებას, რომ რუსეთმა, შესაძლოა, ახალი თავდასხმა განახორციელოს. კრემლი ამ ინფორმაციას უარყოფს და მცდარს უწოდებს.