ჩეხეთში ეპიდსიტუაციის გაუარესების გამო, 30-დღიანი საგანგებო მდგომარეობა გამოაცხადეს, - ინფორმაციას Reuters-ი ავრცელებს.
მთავრობის განკარგულებით, ბარები და რესტორნები 22:00 საათზე დაიხურება, აიკრძალება საშობაო ბაზრობები. ამასთან ერთად, მასობრივ კულტურულ და სპორტულ ღონისძიებებზე დასწრება მაქსიმუმ 1 000 სტუმარს შეეძლება.
მთავრობის წევრების თქმით, შეზღუდვების ამოქმედებიდან 10 დღეში ეპიდვითარების შეფასება მოხდება.
ახალი შეზღუდვების გამოცხადების შემდეგ ცნობილი გახდა, რომ ჩეხეთის პრეზიდენტს მილოშ ზემანს კორონავირუსი დაუდასტურდა და საავადმყოფოში გადაიყვანეს. აღსანიშნავია, რომ ზემანი რამდენიმე საათის გამოწერილი იყო საავადმყოფოდან, სადაც მას, ქრონიკული დაავადების გამო, 46 დღის განმავლობაში მკურნალობდნენ.
ჩეხეთში, ბოლო პერიოდში, კორონავირუსის შემთხვევებმა მნიშვნელოვნად მოიმატა, ქვეყნის ჯანდაცვის სამინისტროს მონაცემებით, რეანიმაციულ განყოფილებებში მოთავსებული კოვიდპაციენტების 70 პროცენტი აუცრელია. ქვეყანაში, სამშაბათს, დაინფიცირების რეკორდულად მაღალი დღიური მაჩვენებელი - 25 000-ზე მეტი ახალი შემთხვევა გამოვლინდა.
აღსანიშნავია, რომ ჩეხეთში ვაქცინირებულია მოქალაქეების მხოლოდ 58 %.